Diajar ngaguar fiqih. Urang diajar shalat
khusyuk margi sholat khusyuk teh diantawis syarat yen shalat urang bakal
ditampi ku Allah Taala. InsyAlloh.
Tos karaos ku urang nyalira yen shalat
khusyuk teh geuningan sesah. Peryogi latihan anu leres-leres supados shalat
urang dugi kana tingkatan khusyuk. Sering pisan nalika urang natepan antawis
lisan sareng manah urang henteu sauyunan. Lisan ngucapkeun “Alloohu akbar”
manah mah ngucapkeun Allaahu akbray...” Heheee... atuh sagala rupi haliyah
dunya kabaruka nuju shalat.
Ieu mafsadat (anu ngarusak) kana shalat. Henteu
kenging diantep margi kabiasaan eta sapertos wae panyawat, upami diantep bilih
langkung parah. Malih kadituna bahaya, shalat urang henteu ditampi, sapertoskeun
tikelan raksukan cucieun anu dialungkeun kana raray urang. Na’uudzu billaah...
Sok sanaos natepan khusyuk teh sesah
namung para ulama maparin cara-cara supados natepan urang khusyuk. Ibadah urang
henteu ngan wungkul usik malikna badan namung manahna oge kedah ngiring shalat. Sing karaos urang natepan teh
nuju madep ka Alloh sinareng nuju nyarios sareng Anjeunna.
Imam al-Ghazali dina kitab Ihya Ulumuddin ngajelaskeun
sapertos kieu:.
ولكن الضعيف لا بد وأن
يتفرق به فكره وعلاجه قطع هذه الأسباب بأن يغض بصره أو يصلى في بيت مظلم أو لا
يترك بين يديه ما يشغل حسه ويقرب من حائط عند صلاته حتى لا تتسع مسافة بصره ويحترز
من الصلاة على الشوارع وفي المواضع المنقوشة المصنوعة وعلى الفرش المصبوغة
Tatapi
jalmi anu lale tangtos paningalna sareng pangupingna eta anu ngajantenkeun
henteu anteb (shalat). Landongna teh tangtos ngalesotkeun diri tina anu matak
nagiwurkeun eta. Sapertoskeun nungkulkeun paningal, natepan di tempat anu poek,
nebihan banda atanapi hal anu ngaganggu emutan urang, milari tempat anu caket
sareng bilik supados paningal urang teu kamana meni. Eta jalmi kedah nebihan
tempat shalat anu caket sareng jalan, di tempat anu aya ukiran sareng kotretan,
sareng sajadah anu loreng (warna).
Cara anu kahiji, anu kedah dipilampah
nyaeta urang terang hal anu matak nagiwurkeun emutan urang. Kasauran pangersa
Imam Al-Ghazali, paningal sinareng panguping mangrupikeun sababiyah pokok
gogoda. Sagala rupi anu kantos katingal atanapi kadangu biasana ujug-ujug hadir
nalika shalat. Ieu ngajantenkeun urang henteu anteb solat, henteu ngartos
sareng henteu emut kana makna aosan anu diaos nalika natepan.
Kanggo solusina urang kedah teras latihan
supados tiasa kakendalikeun. Diantawisna ku nungkulkeun paningal atanapi
meureumkeun soca (namung makruh). Nglangkungan cara eta sahenteuna panigal
urang janten heureut sareng henteu buringhas teuing nalika urang natepan.
Atanapi tiasa oge urang natepanna dina tempat anu poek tur jempling. Biasana
natepan dina tempat eta bakal langkung anteb tinimang dina tempat caang tur
rame.
Cara anu kadua, Posisi natepan. Posisi
oge mangaruhan kana kakhusyukan urang natepan. Pangersa imam Al-Ghazali
mituturan kanggo jalmi anu masih diajar natepan khusyuk supados natepan dina
caketeun bilik atanapi pinding. Margi pinding eta janten hahalang paningal
urang dina neuteup ka satiap sisi urang.
Cara anu katilu, tempat. Margi tempat
natepan urang oge mangaruahn kana kakhusyukan urang. Natepan dina tempat anu seueur
ukiran, lukisan, seueur gambar oge luhureun sajadah loreng tiasa nagiwurkeun
khusyukna manah. Kumargi sakitu tempat natepan kedah di atur sasae-saena kanggo
ngabantos khusyuk natepan.
Walloohu
a’lamu...
Hapunten tina samudaya kalepatan.
Comments
Post a Comment